ಬಾಯಾರಿದ ಕಾಗೆ ( ಮಕ್ಕಳ ಕಥಾಕವನ)

*ಬಾಯಾರಿದ ಕಾಗೆ*

ಕಾಗೆಯೊಂದು ನೀರ ಅರಸಿ
ಅಲೆಯತೊಡಗಿತು
ಎಲ್ಲ ಕಡೆಯೂ ನೀರು ಸಿಗದೆ
ಬಳಲಿ ನೊಂದಿತು||

ನೀರು ಹುಡುಕುತೊಂದು
ಮನೆಯ ಕಡೆಗೆ ಬಂದಿತು
ಗಳಿಗೆಯಲ್ಲಿ ನೀರು ಕಂಡು
ಖುಷಿಯ ಪಟ್ಟಿತು||

ಅಲ್ಪ ಸ್ವಲ್ಪ ಇದ್ದ ನೀರು
ಸಿಗದೇ ಹೋಯಿತು
ಕಾಗೆ ಪಟ್ಟ ಶ್ರಮವು ಎಲ್ಲ
ವ್ಯರ್ಥವಾಯಿತು||

ಗಡಿಗೆ ಪಕ್ಕದಲ್ಲೇ ಕಲ್ಲ
ಗುಂಪು ನೋಡಿತು
ಕೊಕ್ಕಿನಿಂದ ಕಲ್ಲು ತಂದು
ಗಡಿಗೆ ತುಂಬಿತು||

ನೀರು ಮೇಲೆ ಬರುವುದನ್ನು
ಕಾಗೆ ನೋಡಿತು
ಮೇಲೆ ಬಂದ ನೀರು ಕುಡಿದು
ಹಾರಿ ಹೋಯಿತು||

ಕಷ್ಟ ಪ‍‍ಡದೇ ನಮಗೆ ಎಂದು
ಏನೂ ದೊರಕದು
ಕಾಗೆ ಕಥೆಯು ಮರೆಯದಂಥ
ಪಾಠ ಕಲಿಸಿತು||

✍ವೆಂಕಟೇಶ ಚಾಗಿ
ಲಿಂಗಸುಗೂರ